Қарсы көрсеткіштер
такролимусқа немесе басқа макролидтерге жоғары сезімталдық, препарат құрамына кіретін қосымша заттарға, атап айтқанда полиоксиэтиленмен гидрогенизделген майсана майына 60 (HCO-60) немесе құрылымдық жағынан ұқсас қосылыстарға жоғары сезімталдық.
Қолдану кезіндегі сақтық шаралары
Қосымша заттар
Вена ішіне енгізу үшін ерітінді дайындауға арналған концентрат 5 мг/мл Програф® препаратының құрамында анафилактикалық реакцияларды тудыратыны хабарланған полиоксиэтиленмен гидрогенизделген майсана майы бар. Сондықтан препаратты бұрын венаішілік инъекция немесе инфузия арқылы құрамында майсана майының полиоксиэтилен туындылары бар дәрілік препараттарды қабылдаған пациенттерге, сондай-ақ аллергияға бейімділігі бар пациенттерге сақтықпен тағайындау керек. Анафилактикалық реакцияның даму қаупін вена ішіне енгізу үшін ерітінді дайындауға арналған концентрат 5 мг/мл Програф® препаратының қалпына келтірілген концентратын төмен жылдамдықпен енгізу арқылы немесе алдын ала гистаминге қарсы препарат енгізу жолымен азайтуға болады. Инфузияның алғашқы 30 минуты ішінде пациенттерді анафилактоидтық реакцияның болу мүмкіндігін мұқият бақылау қажет.
Бұл дәрілік препараттың құрамында 5 мг/мл вена ішіне енгізуге арналған ерітіндіде 638 мг спирт (этанол) бар, бұл 16 мл сыраға немесе 7 мл шарапқа тең. Бұл дәрілік препараттағы алкогольдің аз мөлшері айтарлықтай әсер етпейді.
Вена ішіне енгізу үшін ерітінді дайындауға арналған концентрат 5 мг/мл Програф® препаратының қалпына келтірілген концентратын кездейсоқ артерияішілік немесе периваскулярлық енгізген жағдайда инъекция орнында тітіркену пайда болуы мүмкін.
Басқа дәрілік заттармен өзара әрекеттесу
Метаболизмдік өзара әрекеттесулер
Жүйе қан ағымында болатын такролимус бауырда CYP3A4 изоферментімен метаболизденеді. Сонымен қатар CYP3A4 изоферментінің қатысуымен ішек қабырғасындағы метаболизм туралы деректер бар. CYP3A4 тежейтін немесе индукциялайтын әсері бар өсімдік тектес дәрілік препараттарды немесе дәрілік заттарды бір мезгілде қабылдау тиісінше қандағы такролимус концентрациясын арттыруы немесе төмендетуі мүмкін. Осылайша, осындай өсімдік тектес дәрілік препараттарды немесе дәрілік заттарды қабылдауды тоқтату такролимус метаболизмінің жылдамдығына, демек, қандағы такролимус деңгейіне әсер етуі мүмкін.
Фармакокинетикалық зерттеулер CYP3A4 тежегіштерін бір мезгілде қолданған кезде қандағы такролимус деңгейінің жоғарылауының негізгі себебі асқазан-ішек жолындағы метаболизмнің тежелуі салдарынан пероральды қабылдаған кезде такролимустың биожетімділігінің артуы болып табылатынын көрсетті. Бауыр клиренсіне әсері онша айқын емес.
Трансплантолог маманның қадағалауымен қандағы такролимус концентрациясын мұқият бақылау, сондай-ақ CYP3A4 изоферментінің қатысуымен метаболизмге әсер етуі мүмкін препараттар бір мезгілде қолданылатын әрбір жағдайда трансплантат функциясын, QT аралығының ұзаруын (ЭКГ арқылы), бүйрек функциясын және нейроуыттылықты қоса алғанда, басқа да жағымсыз құбылыстарды бақылау, қажет болса, такролимустың экспозициясын сол деңгейде ұстап тұру үшін такролимустың дозасын түзету немесе енгізуді тоқтату ұсынылады.
Осылайша, такролимусты CYP3A4 ферментіне әсер ететін препараттармен бірге тағайындаған кезде пациенттерді мұқият бақылау керек, өйткені такролимустың әсері күшеюі немесе бейтараптандырылуы мүмкін.
Такролимусқа әсер ететін дәрілік заттар төмендегі кестеде келтіріледі. Дәрілік заттардың өзара әрекеттесу мысалдары толық және жан-жақты қамтылмаған, сондықтан метаболизмнің сипаты, метаболизм жолдары, ықтимал қауіптер және бір мезгілде қолдануға қатысты нақты шаралар туралы ақпарат алу үшін такролимуспен бірге қолданылатын әрбір препараттың затбелгісін зерделеу керек.