Уральске қаласындағы Балаларға Арналған Нурофен Форты Апельсин 200 Мг / 5 Мл 100 Мл | Рекитт Бенкизер Хелскэр (Великобритания) Лимитед

7-ден 12 жасқа дейінгі балаларға:

- ыстықты түсіретін симптоматикалық дәрі ретінде келесі жай-күйлерде:

• жедел респираторлық аурулар (суық тию, тұмау)

• екпеден кейінгі реакцияларды қоса, дене температурасының көтерілуімен қатар жүретін инфекциялық-қабыну ауруларында

- ауырғанды басатын дәрі ретінде (ауырлығы әлсіз және орташа дәрежедегі ауыру синдромында) келесі жай-күйлерде:

• тіс ауыруы

• бас ауыруы, бас сақинасы

• невралгия

• құлақтың ауыруы

• тамақтың ауыруы

• байламдар созылуы кезіндегі ауыру

• бұлшықеттің ауыруы

• ревматизмдік ауыру, буындардың ауыруы

• ауырсынумен жүретін етеккір

- әсер етуші затына немесе препараттың кез келген компонентіне жоғары сезімталдық

- анамнезінде ацетилсалицил қышқылын, ибупрофенді немесе басқа да қабынуға қарсы стероидты емес препараттарды (ҚҚСП) қабылдауға жауап ретінде аса жоғары сезімталдық реакцияларының болуы (бронх түйілуі, бронх демікпесі, ринит, Квинке ісінуі, есекжем)

- анамнезінде ҚҚСП емдеумен байланысты асқазан-ішектен қан кетулер немесе тесілулер болғанда

- белсенді фазадағы немесе анамнездегі қайталанатын пептидтік ойық жара/қан кету (расталған ойық жара ауруының немесе қан кетудің екі немесе одан көп айқын көріністері)

- цереброваскулярлық немесе кез келген басқа белсенді фазадағы қан кетулері бар пациенттерге

- бауырдың ауыр жеткіліксіздігі немесе бүйректің ауыр жеткіліксіздігі бар пациенттерге

- жүректің ауыр жеткіліксіздігі бар пациенттерге (NYHA жіктеуі бойынша IV функционалдық класы)

- қан түзілудің анықталмаған бұзылулары бар пациенттерге

- құсу, диарея немесе сұйықтықты жеткіліксіз қабылдаудан туындаған ауыр дегидратациясы бар пациенттерге

- жүктіліктің III триместрі

- 7 жасқа дейінгі балалар

- дене салмағы 20 кг аз балалар

Қолдану кезінде қажетті сақтық шаралары

Препаратты мүмкіндігінше қысқа курспен және симптомдарды жою үшін қажетті ең аз тиімді дозада қабылдау ұсынылады.

Ибупрофенді мынадай дәрілік заттармен бір мезгілде қолданудан аулақ болу керек

Басқа ҚҚСП, атап айтқанда, циклооксигеназа-2 селективті тежегіштері: жағымсыз реакциялар туындау қаупінің арту ықтималдығына байланысты, бір мезгілде екі және одан да көп ҚҚСП тобының препараттарын қолдануға болмайды.

Ацетилсалицил қышқылы: ибупрофен мен ацетилсалицил қышқылын бір мезгілде қабылдау әдетте жағымсыз реакциялардың жоғарылауына байланысты ұсынылмайды.

Мынадай дәрілік заттармен бір мезгілде сақтықпен қолдану керек:

Гипертензияға қарсы дәрілер (АӨФ тежегіштері, бетарецепторлар блокаторлары және ангиотензин-II антагонистері) және диуретиктер: ҚҚСП бұл препараттардың тиімділігін төмендетуі мүмкін. Бүйрек функциясы бұзылған кейбір пациенттерде (мысалы, сусыздануы бар пациенттер немесе бүйрек функциясы бұзылған егде жастағы пациенттер) АӨФ тежегіштерімен, бетарецепторлар блокаторларымен немесе ангиотензин-II антагонистерімен және циклооксигеназаны тежейтін дәрілік заттармен бірге қабылдау бүйрек функциясының одан әрі нашарлауына, оның ішінде әдетте қайтымды болып табылатын жедел бүйрек жеткіліксіздігіне әкелуі мүмкін. Осылайша, препараттар біріктірілімін сақтықпен қабылдау керек; бұл әсіресе егде жастағы пациенттерге қатысты. Пациенттерде оңтайлы су теңгерімінің сақталуын қадағалап қатар жүретін ем басталғаннан кейін және одан әрі мезгіл-мезгіл бүйрек функциясын тексеріп отыру қажет. Диуретиктер ҚҚСП нефроуыттылығы қаупін арттыруы мүмкін.

Дигоксин сияқты жүрек гликозидтері: ҚҚСП жүрек жеткіліксіздігін ушықтырып жіберуі, шумақтық сүзілу жылдамдығын төмендетуі және гликозидтердің плазмалық концентрациясын жоғарылатуы мүмкін. Дигоксин препараттарымен бірге Балаларға арналған Нурофен® Форте қабылдау қан сарысуындағы дигоксин деңгейін арттыруы мүмкін. Дұрыс қолданған кезде қан сарысуындағы дигоксин деңгейін тексеру қажет емес (3 күннен аспайды).

Литий препараттары: ибупрофен қан плазмасындағы литий концентрациясын жоғарылатуы мүмкін. Дұрыс қолданған кезде қан сарысуындағы литий деңгейін тексеру қажет емес (3 күннен аспайды).

Калий жинақтаушы диуретиктер: калий жинақтайтын диуретиктермен Балаларға арналған Нурофен® Форте препаратын бірге қабылдау гиперкалиемияға әкелуі мүмкін (қан сарысуындағы калий деңгейін тексеру ұсынылады).

Фенитоин: Балаларға арналған Нурофен® Форте препаратын фенитоин препараттарымен бірге қабылдау қан сарысуындағы фенитоин деңгейін арттыруы мүмкін. Дұрыс қолданған кезде қан сарысуындағы фенитоин деңгейін тексеру қажет емес (3 күннен аспайды).

Метотрексат: Балаларға арналған Нурофен® Форте препаратын метотрексатты қабылдағанға дейін немесе қабылдағаннан кейін 24 сағат ішінде қабылдау метотрексат концентрациясының жоғарылауына және оның уытты әсерінің артуына әкелуі мүмкін.

Такролимус: нефроуыттылық қаупінің жоғарылауы.

Циклоспорин: нефроуыттылық қаупінің жоғарылауы.

Кортикостероидтар: асқазан-ішек ойық жарасы түзілуі немесе қан кету қаупінің жоғарылауы.

Антикоагулянттар: ҚҚСП варфарин сияқты антикоагулянттардың әсерін күшейтуі мүмкін.

Тромбоциттерге қарсы препараттар және серотонинді кері қармаудың селективті тежегіштері (СКҚСТ): асқазан-ішектен қан кету қаупінің жоғарылауы.

Сульфонилмочевина препараттары: бірге қабылдаған кезде сақтық шарасы ретінде қандағы глюкоза деңгейін тексеру ұсынылады.

Зидовудин: зидовудинмен және ибупрофенмен бірге ем қабылдаған, гемофилиясы бар АИТВ жұқтырған пациенттерде гемартроз бен гематомалардың туындау қаупінің жоғарылағаны туралы деректер бар.

Пробенецид және сульфинпиразон: құрамында пробенецид немесе сульфинпиразон бар дәрілік препараттар ибупрофеннің экскрециясын кейінге қалдыруы мүмкін.

Баклофен: ибупрофен қабылдағаннан кейін баклофен уыттылығының даму қаупі бар.

Ритонавир: плазмадағы ҚҚСП концентрациясын жоғарылатуы мүмкін.

Аминогликозидтер: ҚҚСП аминогликозидтердің экскрециясын төмендетуі мүмкін.

Хинолонды антибиотиктер: ҚҚСП және хинолондар қатарының антибиотиктерімен бірге ем қабылдайтын пациенттерде құрысулардың туындау қаупі артуы мүмкін.

CYP2C9 тежегіштері: ибупрофенді CYP2C9 изоферменті тежегіштерімен бір мезгілде қолданған кезде CYP2C9 субстраты болып табылатын ибупрофеннің әсері күшеюі мүмкін. Ибупрофенді CYP2C9 тежегіштерімен бірге қолданған кезде, әсіресе ибупрофеннің жоғары дозаларын бір мезгілде вориконазолмен және флуконазолмен бірге қолданған кезде ибупрофен дозасын төмендету мүмкіндігін қарастыру қажет.

Каптоприл: эксперименттік зерттеулерде ибупрофеннің натрий экскрециясын тежейтіні (каптоприлдің әсері) көрсетілген.

Холестирамин: ибупрофен мен холестирамин бір мезгілде қолданғанда ибупрофеннің сіңуі кідіріп, төмендейді (25%-ға). Бұл дәрілік препараттарды бірнеше сағат аралықпен қабылдау керек.

Арнайы ескертулер

Препаратты симптомдарын бақылауға қажетті қысқа уақыт ішінде ең аз тиімді дозада қолдану жағымсыз реакцияларды азайтуға мүмкіндік береді.

Егде жастағы пациенттер

Егде жастағыларда ҚҚСП қабылдағаннан кейін жағымсыз реакциялардың жиілігі, әсіресе асқазан-ішектен қан кету немесе өлімге әкеп соғуы мүмкін тесілу сияқты реакциялар жоғарылайды. Егде жастағыларда жағымсыз реакциялар салдарының даму қаупі анағұрлым жоғары екендігі байқалады.

Келесі аурулармен ауыратын пациенттерге сақ болу керек:

- Жүйелі қызыл жегі және дәнекер тіннің аралас ауруы, асептикалық менингиттің даму қаупі артуына байланысты.

- Порфирин метаболизмінің туа біткен бұзылуы (мысалы, жедел интермиттелетін порфирия).

- Асқазан-ішек жолдары тарапынан бұзылулар және ішектің созылмалы қабыну аурулары (ойық жаралы колит, Крон ауруы).

- Гипертензия және/немесе анамнездегі жүрек жеткіліксіздігі, өйткені ҚҚСП қабылдау аясында сұйықтықтың іркілуі және ісіну байқалған.

- Бүйрек жеткіліксіздігі, себебі бүйрек функциясының төмендеуі байқалады.

- Бауыр дисфункциясы.

- Тікелей ауқымды хирургиялық араласудан кейін.

- Сенна қызбасы, мұрын қуысының полиптері немесе тыныс алу жүйесі тарапынан созылмалы обструктивті бұзылулар, бұл демікпе ұстамалары (анальгетикалық демікпе деп аталатын), Квинке ісінуі немесе есекжем түріндегі аллергиялық реакцияның даму қаупі жоғарылауымен байланысты.

- Басқа заттарға аллергиялық реакциялары бар пациенттерде, осы препаратқа аса жоғары сезімталдық реакциясы даму қаупінің жоғарылауына байланысты.

Тыныс алу ағзалары тарапынан

Анамнезінде бронх демікпесі немесе аллергиялық реакциялары бар пациенттерде бронх түйілуі құбылысы дамуы мүмкін.

Басқа ҚҚСП

Препаратты басқа ҚҚСП-мен, оның ішінде циклооксигеназа-2 селективті тежегіштерімен бірге қолдануға жол берілмейді.

Асқазан-ішек жолы тарапынан

Емдеудің кез келген кезеңінде ҚҚСП қабылдаған кезде асқазан-ішектен қан кету, ойық жара немесе перфорация дамуы мүмкін, кейде өлімге әкеледі. Сонымен қатар, анамнезде АІЖ тарапынан күрделі асқынулары және алдын ала байқалатын симптомдары жоқ пациенттерде дамуы мүмкін. Анамнезінде ойық жарасы бар, әсіресе қан кетумен немесе перфорациямен асқынған пациенттерде және егде жастағы пациенттерде ҚҚСП дозасып ұлғайтқан кезде асқазан-ішектен қан кету, ойық жара немесе перфорация қаупі артады. Мұндай пациенттерде препарат қабылдауды мүмкін болатын ең аз дозадан бастаған жөн. Осындай пациенттерге, сондай-ақ препаратты ацетилсалицил қышқылының төмен дозаларымен немесе асқазан-ішек жолы тарапынан асқынулардың даму қаупін арттыруға қабілетті басқа дәрілік заттармен бірге қабылдайтын пациенттер үшін қорғаныш дәрілерді (мысалы, мизопростол немесе протонды помпа тежегіштері) пайдалана отырып, кешенді емдеу нұсқасын қарастырған жөн.

Анамнезінде ҚҚСП қабылдаған кезде асқазан-ішек жолы тарапынан асқынулары бар пациенттер, әсіресе егде жастағы пациенттер, әсіресе емдеудің бастапқы кезеңінде құрсақ қуысы ағзалары тарапынан болатын кез келген ерекше симптомдары (әсіресе асқазан-ішектен қан кету) туралы хабарлау керек.

Ойық жара немесе қан кету қаупін арттыруы мүмкін дәрілік заттарды, мысалы, пероральді кортикостероидтар, антикоагулянттар (мысалы, варфарин), серотонинді кері қармаудың селективті тежегіштері немесе тромбоциттерге қарсы препараттарды (мысалы, ацетилсалицил қышқылы) бір мезгілде қабылдайтын пациенттерге препаратты сақтықпен ұсынған жөн.

Егер ибупрофен қабылдайтын пациенттерде асқазан-ішектен қан кету немесе ойық жара пайда болса, емдеуді тоқтату керек.

Асқазан-ішек жолының аурулары (ойық жаралы колит, Крон ауруы) бар пациенттерге аталған аурулардың ықтимал өршу қаупіне байланысты ҚҚСП сақтықпен тағайындаған жөн.

Тері жабындары тарапынан.

ҚҚСП қолданғаннан кейін эксфолиативті дерматитті, Стивенс-Джонсон синдромын және уытты эпидермалық некролизді қоса (өліммен аяқталуға дейін), күрделі тері реакцияларының дамығаны туралы сирек хабарламалар бар. Бұл реакциялар көп жағдайда емдеудің бірінші айында пайда болады.

Құрамында ибупрофен бар препараттарды қабылдау аясында жедел жайылған экзантематозды пустулез (AGEP) дамуы туралы хабарланған. Тері бөртпесі, шырышты қабықтардың зақымдануы және аса жоғары сезімталдықтың кез келген басқа көріністері пайда болуының алғашқы белгілерінде препарат қабылдауды тоқтату керек.

Желшешегі бар пациенттерде ҚҚСП қолдану тері мен теріасты шелмайының инфекциялық-қабыну ауруларының ауыр іріңді асқынуларының (мысалы, некроздаушы фасциттің) даму қаупінің жоғарылауымен байланысты болуы мүмкін. Осыған байланысты, препараттың желшешек кезінде қолданылуына жол бермеу ұсынылады.

Жүрек-қантамырлық және цереброваскулярлық әсерлер

Ибупрофенді, әсіресе жоғары дозаларда (тәулігіне 2400 мг) қолдану артериялық тромбоздық құбылыстар (мысалы, миокард инфарктісі немесе инсульт) пайда болу қаупінің шамалы жоғарылауымен байланысты болуы мүмкін. Төмен дозада қолданғанда (атап айтқанда, тәулігіне ≤ 1200 мг) ибупрофен тромбоздық құбылыстардың қаупін арттырмайды.

Бақыланбайтын гипертензиясы, іркілісті жүрек жеткіліксіздігі (NYHA бойынша II–III класс), жүректің ишемиялық ауруы, шеткері артериялық ауруы және/немесе цереброваскулярлық ауруы бар пациенттерге ибупрофенді өте сақтықпен тағайындау және жоғары дозаларды (тәулігіне 2400 мг) болдырмау керек.

Сондай-ақ, жүрек-қантамырлар асқынуларының қауіп факторлары бар (мысалы, гипертензия, гиперлипидемия, қант диабеті, сондай-ақ темекі шегетін) пациенттерге, әсіресе жоғары дозаларды (тәулігіне 2400 мг) қабылдау қажет болған кезде ұзақ мерзімді ем тағайындағанда ерекше сақ болу керек.

Бүйрек тарапынан бұзылулар

Анальгетиктерді тұрақты қабылдау, әсіресе әртүрлі ауырсынуды басатын дәрілердің біріктірілімі, әдетте бүйрек жеткіліксіздігінің (анальгетикалық нефропатия) даму қаупі бар тұрақты бүйрек зақымдануына әкеледі.

Дегидратация дамыған балаларда бүйрек функциясының бұзылу қаупі бар.

Инфекциялар

Ибупрофен инфекциялардың қызу мен ауырсыну сияқты белгілерін жасыруы мүмкін. Сондықтан, Балаларға арналған Нурофен® Форте препараты инфекцияның тиісті емін кейінге қалдыруын, ал бұл асқыну қаупінің жоғарылауына әкелуі мүмкін. Бұл бактериялардан туындаған пневмонияда және желшешекпен байланысты бактериялық тері инфекцияларында байқалды. Егер сіз бұл дәріні инфекция кезінде қабылдап жүрсеңіз, инфекция симптомдары сақталса немесе нашарласа, дереу дәрігерге қаралыңыз.

Басқа ескертулер

Аса жоғары сезімталдықтың жедел ауыр реакциялары (мысалы, анафилаксиялық шок) өте сирек байқалады. Балаларға арналған Нурофен® Форте қабылдағаннан кейін аса жоғары сезімталдық реакциясының алғашқы белгілері пайда болса, емдеуді тоқтату керек. Медициналық қызметкер симптомдарды ескере отырып, қажетті шараларды қабылдауы тиіс.

Ибупрофен, балаларға арналған Нурофен® Форте препаратының құрамындағы белсенді зат - тромбоциттік функцияны (тромбоциттер агрегациясы) уақытша тежей алады. Сондықтан коагуляцияның бұзылуы бар пациенттердің жағдайын мұқият қадағалау керек.

Балаларға арналған Нурофен®Форте препаратын ұзақ уақыт қолданғанда бауыр мен бүйрек функциясын, сондай-ақ қанның жалпы талдауын үнемі бақылау қажет.

Бас ауруына ауыруды басатын кез келген дәріні ұзақ уақыт бойы қолдану оның күшеюіне әкелуі мүмкін. Бұл жай-күйде немесе жағдайдың осылай дамуына күдік болғанда медициналық кеңеске жүгіну керек және емдеуді тоқтату қажет. «Дәрілік заттарды шамадан тыс пайдаланудан туындаған бас ауыруы» деген диагноз, бас ауыруын басу үшін дәрілік препараттарды үнемі қолдануына қарамастан немесе осы қолдану нәтижесінде басы жиі немесе күнделікті ауыратын пациенттерге қойылуы мүмкін.

Алкогольді қатар тұтынған кезде, әсіресе асқазан-ішек жолы немесе орталық жүйке жүйесі тарапынан ҚҚСП тудырған жағымсыз реакциялардың күшеюі мүмкін.

Қосымша заттар бойынша ақпарат

Бұл препараттың құрамында сұйық мальтитол бар.

Бұл дәрілік препаратты фруктоза жақпаушылығы сияқты сирек тұқым қуалайтын бұзылулары бар пациенттерге қабылдамаған жөн.

Сұйық мальтитолдың болуына байланысты бұл препараттың жеңіл іш жүргізетін әсері бар. Энергетикалық құндылығы мальтитолдың 2,3 ккал/г құрайды.

Препараттағы апельсин хош иістендіргіші 2М16014 құрамында бидай крахмалы (глютен іздері) бар және бидай крахмалына аллергиясы бар адамдарға қолдануға болмайды.

Бұл дәрілік препаратта 15 мл суспензияға 28,09 мг натрий бар (1 мл суспензияға =1,87 мг натрий). Мұны бақыланатын натрий диетасын ұстанатын пациенттер назарға алуы тиіс.

Жүктілік немесе лактация кезінде

Жүктілік

Жүктіліктің бірінші және екінші триместрі кезінде ибупрофенді өте қажет болған жағдайда ғана тағайындау керек. Егер әйел ибупрофенді жүкті болуға талпынып жүргенде немесе жүктіліктің бірінші және екінші триместрі кезінде қабылдаса, препараттың дозасы мен емнің ұзақтығы ең азы болуы тиіс.

Жүктіліктің үшінші триместрі кезінде простагландиндер синтезінің кез келген тежегіштері шаранаға қолайсыз әсер етуі және төмендегі жайттарға әкелуі мүмкін:

- кардиопульмональды уыттылық (артериялық түтіктің мерзімінен бұрын жабылумен және өкпе гипертензиясының дамуымен);

- бүйрек жеткіліксіздігі мен олигогидрамнионға дейін үдемелі бүйрек дисфункциясы.

Олигогидрамнион жиі болады, бірақ әрдайым емес, емдеуді тоқтатқан кезде қайтымды. Ұзақ мерзімді олигогидрамнион асқынуы аяқ-қолдың контрактурасын және өкпенің жетілуі кідіруін қамтуы мүмкін. 

Жүктілік соңында простагландиндер синтезінің тежегіштерін қабылдау ана мен нәрестеде мынадай жағдайлардың дамуына әкелуі ықтимал:

- қан кету уақытының ұзаруы, тіптен өте төмен дозада антиагрегациялық әсерінің дамуы;

- жатыр бұлшықетінің жиырылуын тежеу, бұл босану әрекетінің кідіріп басталуына және босану ұзақтығының артуына әкеледі.

Осының салдарынан ибупрофенді жүктіліктің үшінші триместрінде қолдануға болмайды.

Лактация

Ибупрофен және оның метаболиттері аз мөлшерде емшек сүтіне өтеді. Қазіргі уақытта емшек сүтімен қоректенетін сәбилерге теріс әсер етуі туралы деректер жоқ, сондықтан ауырсыну мен қызбаны жеңілдету үшін ұсынылған дозаларды қысқа мерзімді қабылдағанда емшек сүтімен емізуді тоқтата тұрудың қажеті жоқ.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Қысқа мерзімді қолдану кезінде бұл дәрілік препарат механизмдерді және көлік басқару қабілетіне өте аз әсер етеді немесе әсер етпейді.

100 мл немесе 150 мл суспензиядан алғаш ашылуы бақыланатын полипропилен қақпағы бар, полиэтилентерефталаттан жасалған күңгірт түсті құтыға құйылған.

Құты тығыздығы төмен полиэтиленнен жасалған, ортасында өлшегіш шприцке арналған саңылауы бар тығынмен жабылған.

1 құтыдан өлшегіш шприцпен жиынтықта медициналық қолдану жөніндегі қазақ және орыс тілдеріндегі нұсқаулықпен бірге картон қорапқа салынған.

25 °С-ден аспайтын температурада сақтау керек.

Балалардың қолы жетпейтін жерде сақтау керек!

3 жыл.

Құтыны алғаш рет ашқаннан кейін – 6 ай.

Жарамдылық мерзімі өткеннен кейін қолдануға болмайды!